姨丈：
仲記得我哋最後一次喺婆婆屋企食飯，當時我同其他屋企人影緊離開始最後合照，明明我都想同你影返張相，但係我就係唔知點解開唔到口。
一直以來同我覺得你關係都好似尷尷尬尬咁，可能係源於以前喺你屋企借住嘅時候同你有過啲磨擦，搞到大家都唔係好識點同對方溝通。細個嘅時候成日晚晚打機打到好夜，搞到你瞓唔到覺，最後你終於頂唔順叫咗我翻屋企；而你有時善意嘅提醒同關心，我都好少細心傾聽，反而覺得煩厭，有時候重會頂嘴，搞到大家都有啲唔開心。
知道你病咗之後，其實一直都好想打比你同你傾下計。但係又唔知講乜嘢好，多數都係不了了之，心諗重有大把時間，或者到時你已經好翻。不過情況卻係相反，當我知道你嘅身體狀況急轉直下，FaceTime 你嘅時候，你嘅病情已經嚴重到比唔到咩反應。嗰陣時我非常後悔冇早啲搵你，諗起嘅只有我哋之前唔開心嘅事，一心只想同你道歉，希望自己唔洗一世內疚。
直到你離世，我一直諗唔到點寫呢篇悼文，慢慢諗翻起以前同你經歷嘅點點滴滴，發現我哋其實唔係只有唔開心嘅回憶，有太多太多美好嘅事我居然忘記咗。
「喂！醒你啦，呢隻果仁好好食，阿信屋買架！」個陣時你同我分享你最鐘意食嘅小食，我重記得嗰盒紅色果仁好食到停唔到口！
「通常你鐘意嘅女仔都好多人會鐘意，會有好多競爭對手～」當日你同我大談戀愛經驗，講起你以前嘅往事，小弟獲益良多！
「不如我哋都影翻張相啦！」多謝你當日擊破咗我嘅猶豫，主動邀請我同你合照。我仲諗返起你當日同我分享以前喺英國讀書嘅經驗，重話會資助我歐遊，比我開下眼界～睇翻張相，大家都面露笑容，其實就係你同我之間開心經歷過嘅鐵証，仲有太多太多由細到大嘅開心嘢不能盡錄，怕尷尬只不過係過多嘅憂慮，令我唔記得咗你由細到大對我無數嘅慰問同埋幫助，你喺我生命入面留下更多嘅係愛同關心。
姨丈，多謝你處處容忍我呢個不識時務唔識講嘢嘅年輕人，多謝你咁愛同關心你屋企人，多謝你咁大方分享你嘅經驗同知識比我，非常感激你出現喺我生命當中。希望來日有機會同你好似以前咁食下野傾下計，暢談一番！