我姑丈份人好長氣，成日好鍾意同人講道理，所以佢做到教授。雖然我唔係佢的學生，但佢成日都同我分享佢的過去、經歷同埋佢對某啲野的睇法，希望比到我多啲唔同角度的分析。基本上我同佢咩都會傾，傾下去外國生活點阿、揀咩科、搵咩工，甚至可能傾下點樣識女仔。所以多謝佢同我講過呢啲嘢，比到好多方向我、好多啟發同好多陪伴。特別係陪伴方面我想再一次多謝佢，因為我阿爸係我中一的時候就過左身，而姑丈佢會係個時陪我同細佬去周圍行下散下心，之後仲買左幾隻倉鼠比我地希望可以分散我地的注意力。多謝佢令到我個刻的心情有好轉到。同埋呢，佢每逢新年都會同我地買衫，比我感受節日原來係可以咁樣過，同時係個刻都感受到被愛的感覺。所以多謝佢，佢係一個好好的姑丈，一個好盡責的姑丈，我深信佢係大家心目中都係咁盡責，一個盡責的屋企人、一個盡責的老師、一個盡責的基督徒，希望我哋繼續以佢做榜樣。