To 爸爸
係我眼中我爸爸佢真係一個英雄
佢真係好努力工作 雙手撐起我哋哩個家
佢自己係一個好節省嘅人嚟 但係佢就好願意滿足我同媽媽嘅心願
作為父親哩個角色 佢亦都同好多嘅父母一樣 會囉唆 會緊張 愛錫佢嘅孩子 亦即係我
我成日都會嫌佢好長氣 講嘢成日都重重覆覆 講完一次又一次 但係其實睇返我哋嘅對話 就算每次有幾多嘢講都好所有嘢嘅最尾都會講句 俾心機啊 加油啊 爸爸支持你㗎 我做每件事佢都好鼓勵
爸爸對每一件事都好上心 幾年前媽媽中風 其實過后媽媽已經康復 但係每次嘅檢查 爸爸佢都會做足準備 上網自己查啲資料 諗好要問醫生啲咩問題 做手術 係要做啲乜
媽媽係澳洲做個一次手術 爸爸係醫院嗰個canteen坐咗成日 真係一刻都冇離開過 直至佢親眼探到媽媽先肯走
之前我只係以鼓勵嘅形式同佢講 如果係我就算希望係幾咁渺茫 成功率得0.001％都好我都會去試 冇諗過佢就記得咁深 深到當佢神志已經唔係好清醒嘅時候佢依然同我提哩句說話：飛飛啊你之前講過0.001％ 爸爸聽你講 盡咗力喇
亦都係因為我講嘅哩一句說話令佢重新選擇做 car-t 治療 而冇就咁放棄
爸爸 雖然你之前同我講16年前唔係佢選擇我 而係天父托付咗我俾佢 但係我始終都好多謝好感謝你俾我有機會成為你嘅家人 成為你嘅女兒 俾我有好嘅家庭 你肯教導我 你對我嘅養育之恩
雖然你未能夠親身出席我未來嘅人生大大小小嘅節目
但係我相信你會係另外一個地方 守護我 等待我
我哋嘅再見 係喺天家再次相見 所以我成日都講：我哋下次見喇 一定會見嘅
我準備咗一首歌俾爸爸
哩首歌叫信心的等待
首歌正正描述到患難當中你依然充滿信心等待仰望神
哩首未必係佢最鍾意嘅一首歌 但係我最鍾意唱比佢聽嘅歌