爸爸，
記得你之前講過 有啲人60 有啲人70 有啲人40 咁可能我就係50囉 聽完哩句我都喊咗 唔明白點解六合彩冇中 但係就中左淋巴癌
一開始我都抱住好樂觀嘅心態 畢竟有好多嘅案例都成功 真係都冇諗過你會離開
我一直以為父母會陪你陪到你結咗婚生埋仔先離開 今次神就證明咗比我睇佢真係想幾時帶你走就隨時都可以
事發過後我都一直懷疑同質問神 點解 點解佢咁好嘅一個人你要帶走佢 點解我地呼求左咁多次你好似冇聽到？我地放下一切黎到你面前去求你 點解你派咁多天使係我地嘅身邊但係最終要唔救佢？ 點解你救到媽媽 但係就唔救爸爸
但係經歷咁多嘅爸爸佢一次都冇懷疑過神 冇離開過佢 佢仍然好信靠佢依靠佢 我唔明 係咪所有我地求嘅嘢都神都唔會俾我地
但係可能神就係要我學習哩樣嘢 有啲嘢你唔使求就有 有啲嘢 就算你撕心裂肺叫曬救命 雙膝跪地最終都係失去 你就係要接受
信心的等待係我揀嘅一首歌亦都係我好鍾意嘅一首歌，但係我鍾意哩首歌並唔係因為佢副歌講我地點樣佢讓神卓緊我地嘅雙手，而係因為我覺得前面講嘅實在太真實太好
明天怎麼你還是不知道
越想得到的總會得不到
人生就像一片雲霧
出現少時就不見到
何必計較那得失終老
我好少表達對父母嘅關心 甚至乎可以用冷漠黎形容 出左事之後 我冇好關心咁問候佢嘅每一日 冇好積極咁講啲鼓勵嘅說話 冇同佢分享我係澳洲嘅點點滴滴 佢miss out左好多
同我個距離好似好遠咁 我又嫌佢好長氣
但係佢卻因為我講嘅一句 0.0001% 都唔放棄而選擇繼續奮鬥 帶住疲倦 滿身傷痕嘅身體再次作戰 我好佩服佢 爸爸你真係好叻
但係最終佢冇戰勝癌細胞 敗比癌細胞擴散嘅速度 佢走後好似咩都冇變 但係又好似咩都變左 我同媽媽去樹仁宿舍執嘢 佢嘅所有嘢都係關於我地 牆上掛滿曬我地嘅合照 照片 手機 iPad 電腦嘅背景全部都係我地三個人嘅相 係我地唔係佢身邊嘅時間 究竟每次係佢無助 寂寞嘅時候 佢到底係點樣度過？佢對我地嘅思念 永遠超出我嘅預想
佢嘅離開 我冇好似媽媽咁 日日夜夜掛住佢 以淚洗面 但係真心咁講句 我唔捨得 真係唔捨得 唔捨得 好唔捨得 佢仲有好多嘢未做 未完成
我仲未大曬 我得16歲 連18都未到 憑咩就咁就離開
或許我就係要學習放下哩啲嘅執著
爸爸 雖然你成日都講話 '唔係我揀架 唔係我揀架，係神將你交比我㗎'
但係都想講返聲多謝 多謝你16年黎嘅照顧 包容 同愛 你嘅長氣係因為你愛我 所以你想分享你嘅經歷等我唔好行彎路
多謝你比我成為你嘅家人 你嘅女兒
我唔識表達我嘅關心 但係 我想講：我愛你 爸爸
飛飛
飛飛：
你的感受很真實！媽媽跟你一樣有很多不明白，心裡很痛，很捨不得爸爸，好想他在我們身邊。
為你這麼年輕便要承受這種喪親之痛，感到極度難過！
對你而言，信仰的考驗提早來臨⋯⋯並且，這考驗又大又難！
驗證信心的真假，不在風調雨順的日子，而是在波濤洶湧的時候
我們可以不明白，可以問，可以不接受這種結果…..但盼望我們能通過這樣的考驗而不放棄神，並完成我們在世的職責，就像爸爸所説：任務完成，平安歸隊！
飛飛，爸爸離開了，但他對你的愛常存在心！
媽媽愛你！